സഞ്ചാരികളുടെ സ്വർഗ്ഗം അഥവാ സ്കോട്ട് ലൻഡ് (7)

Scot Monument
വിക്ടോറിയൻ ഗോതിക് ശില്പ രീതിയിൽ 200.6 അടി ഉയരത്തിൽ 287 പടികളുമായി എഡിൻ ബറ കൊട്ടാരത്തിന്റെ അടുത്തുള്ള പ്രിൻസസ് സ്റ്റ്രീറ്റിൽ കവിയും നോവലിസ്റ്റുമായ സർ വാൾട്ടർ സ്കോട്ട് ന്റെ ഓർമ്മയ്ക്കായി സ്ഥാപിച്ചതാണ്. കയറി ക്ഷീണിക്കുമ്പോൾ ഇടയ്ക്കിടെ നില്ക്കാൻ സ്ഥലം ഒഴിച്ചിട്ടിരിക്കുന്നു. വളഞ്ഞു പുളഞ്ഞു പോകുന്ന 287 പടികളും കയറിയാൽ അവർ ഒരു സാക്ഷ്യപത്രം തരും. എഡിൻ ബറ കയറി അവശരായിരുന്നതിനാൽ ആ സാഹസത്തിനൊന്നും ഞങ്ങൾ മുതിർന്നില്ല. 1838 ൽ ജോണ് മൊർവൊ (മെൽരൊസ് അബ്ബെയുടെ ശില്പി) എന്ന കള്ളപ്പേരിൽ അപേക്ഷിച്ച കെംപ് എന്ന യാതൊരു ഔപചാരിക സാങ്കേതിക പരിജ്ഞാനവും ഇല്ലാത്തയാളുടെ ഡിസൈൻ ആണ് അംഗീകരിക്കപ്പെട്ടത്. നേരത്തെ ഇയാൾ സ്വന്തം പേരിൽ ഗ്ലാസ്ഗോ കതീഡ്രൽ പണിയാനായി ഒരു പ്ലാൻ കൊടുത്തത് തള്ളപ്പെട്ടത് കൊണ്ടാണിങ്ങനെ ഒരു സാഹസം അയാൾ ചെയ്തത്. 1845 ൽ ഉത്ഘാടനം ചെയ്തു. 1844 ൽ നിർഭാഗ്യവാനായ കെംപ് പണി കഴിഞ്ഞു മടങ്ങുമ്പോൾ കനത്ത മഞ്ഞിൽ യൂണിയൻ കനാലിൽ വീണു മരിച്ചു പോയിരുന്നു.

സർ ജോണ് സ്റ്റീൽ എന്ന പ്രഗല്ഭനായ ശില്പിയാണ് സ്കോട്ടിന്റെ പ്രതിമ രൂപകല്പന ചെയ്തത്. റോമിൽ പോയി ശില്പകല അഭ്യസിച്ച ഇദ്ദേഹമാണ് അലെക്സാൻഡർ ബ്യൂസിഫാലസിനെ മെരുക്കുന്ന ശിൽപം നേരത്തെ ഉണ്ടാക്കിയിരുന്നത്.

Scottish National Gallery

ഒരേ വലിപ്പത്തിലുള്ള പാറക്കഷണങ്ങൾ ഇട്ടു അതിനു മുകളിൽ പശ മണ്ണും മറ്റും ഇട്ടു ബലപ്പെടുത്തുന്നതു John Loudon Mac Adam എന്ന സ്കോട്ടിഷ് എൻജിനീയർ 1820 ൽ കണ്ടു പിടിച്ച റോഡ് ഉറപ്പിക്കൽ സൂത്രമാണ്. Macadamize (Mac + Adam + ize) എന്ന് പറയപ്പെടുന്ന ഈ സാങ്കേതിക വിദ്യ ഉപയോഗിച്ച് എഡിൻ ബറയുടെ പ്രിൻസസ് സ്റ്റ്രീട്ടിനും റോയൽ മൈലിനും ഇടയ്ക്കുണ്ടായിരുന്ന Lor Noch എന്ന ചതുപ്പിൽ നിന്നും 15 ലക്ഷത്തിലേറെ വണ്ടി മണ്ണ് കൊണ്ട് വന്നു The Mound എന്ന കൃത്രിമക്കുന്നുണ്ടാക്കി അതിന്മേലാണ് 1859 ൽ ഇത് സ്ഥാപിച്ചിരിക്കുന്നത്. ഇത് പഴയ നഗരവും പുതിയ നഗരവും തമ്മിൽ ബന്ധിപ്പിക്കുന്നു. അടിയിലൂടെ വെള്ളം ഒഴിഞ്ഞു പോകാനും തീവണ്ടി പോകാനും സൗകര്യമൊരുക്കിയിട്ടുണ്ട്.

മണ്ണെടുത്ത ഭാഗം ഇപ്പോൾ വിശാലമായ ഫാക് ലണ്ട്സ് മെമ്മോറിയൽ ഗാർഡൻ. പുൽത്തകിടിയും പൂന്തോപ്പും ഭക്ഷണ ശാലയും ജലധാരയന്ത്രവും മറ്റുമൊക്കെ പിടിപ്പിച്ചു മനോഹരമാക്കിയിരിക്കുന്നു.

രണ്ടാം ലോക മഹാ യുദ്ധത്തിൽ ഇവിടെ നിന്നും പരിശീലനം നേടിയ നോർവീജിയൻ പട്ടാളക്കാർ, ഇവരുടെ ആതിഥ്യ മര്യാദയെ പ്രകീർത്തിച്ചു സ്ഥാപിച്ച കല്ലും ഇവിടെയുണ്ട്.

വിശ്രമിക്കാനും ചായ കാപ്പി ലഘു കടി ഇത്യാദിയൊക്കെ കഴിക്കാം. അവിടെ നിറഞ്ഞു കവിഞ്ഞ കുപ്പത്തൊട്ടിയിൽ നിന്നും താഴേക്ക് വീണ ഭക്ഷണ ശകലങ്ങൾ തിന്നാൻ സീ ഗൾ എന്ന കടൽക്കാക്ക ഇഷ്ടംപോലെയുണ്ട്. ആദ്യമായാണ് അങ്ങിനെയൊരു കാഴ്ച ഇംഗ്ലണ്ടിൽ വന്ന ശേഷം ഞാൻ കാണുന്നത്.

നവോത്ഥാന കാലഘട്ടം മുതൽ ഇരുപതാം നൂറ്റാണ്ടു വരെയുള്ള സ്കോട്ലണ്ടിന്റെയും മറ്റു യൂറോപ്യൻ രാജ്യങ്ങളുടെയും ചിത്ര – ശില്പ കലാ ശേഖരം ഇവിടെ കാണാം.

Michaelozzo രൂപകൽപന ചെയ്ത യോഹന്നാൻ സ്നാപകന്റെ ശിൽപം സവിശേഷ ശ്രദ്ധയാകർഷിക്കുന്നു.

ഡാന്റെയുടെ Divine Comedy എന്ന ഇതിഹാസ രചനയിലെ രംഗങ്ങളും ഇവിടെ ജീവൻ തുടിക്കുന്നത് കാണാം.

Hugo Van Der Goes എന്ന ചിത്രകാരന്റെ Holy Trinity എന്ന ചിത്രവും വളരെ മനോഹരം. യാതൊന്നിന്റെയും പ്രതിമയോ സാദൃശ്യമോ ഉണ്ടാക്കാൻ പാടില്ലെന്നുള്ള കല്പന പുറപ്പെടുവിച്ച ദൈവത്തിന്റെ ചിത്രം, “ആറാം ദിവസം ദൈവം മണ്ണാൽ സൃഷ്ടിച്ചു മർത്ത്യനെ, ഏഴാം ദിവസം മർത്ത്യൻ കല്ലാൽ ദൈവത്തെയും തഥാ” എന്ന കുഞ്ഞുണ്ണിക്കവിത എന്നെ ഓർമ്മപ്പെടുത്തി. ആ കുറിയ മനുഷ്യന്റെ വലിയ പ്രതിഭയ്ക്ക് മുൻപിൽ ഞാൻ മനസാ നമിച്ചു.

മറ്റു പല പ്രശസ്തരുടെയും ശില്പങ്ങളും ചിത്രങ്ങളുമൊക്കെ ഇവിടെയുണ്ട്. പക്ഷെ ഞങ്ങളുടെ ഇന്നത്തെ പരിപാടി അവസാനിപ്പിക്കാറായതിനാൽ ഇതൊന്നും വിശദമായി കാണാനോ വിലയിരുത്താനോ കഴിഞ്ഞില്ല.

ഇവിടെക്കിറങ്ങി വരുമ്പോൾ കൌതുകകരമായ ഒരു ക്ലോക്ക് ഞങ്ങൾ കണ്ടു. മുഴുവൻ പലതരം പൂവുകൾ കൊണ്ടുണ്ടാക്കിയതാണിത്. സൂചി പോലും. ഓരോ മണിക്കൂറിലും ഇതിനോടുബന്ധിച്ചു സ്ഥാപിച്ചിട്ടുള്ള ഒരു കൂട്ടിൽ നിന്നും ഒരു കിളി ഇറങ്ങി വന്നു ചിലച്ചിട്ടു കയറിപ്പോകും.

ഇവിടെ നിന്നും കാണാം അങ്ങകലെ തലയുയർത്തി നില്ക്കുന്ന എഡിൻ ബറ കൊട്ടാരം.

ചില ഭാഗങ്ങൾ ഉരുക്ക് വല കൊണ്ട് ശക്തിപ്പെടുത്തിരിക്കുന്നു. വഴിയിൽ പല ഇടുങ്ങിയ സ്ഥലങ്ങളിലും ഇങ്ങിനെ പാറ ഇടിഞ്ഞു വീഴാതിരിക്കാൻ വലയിട്ടു തടഞ്ഞിരിക്കുന്നത് കാണാം.

ഇതിനടുത്താണ് വി. കത്ബർറ്റ് പള്ളി. ലോഗരിതം കണ്ടു പിടിച്ച നേപ്പിയർ, പരിണാമ സിദ്ധാന്തത്തിന്റെ ഉപജ്ഞാതാവായ ചാൾസ് ഡാർവിന്റെ മാതുലൻ എന്നിവരുടെ ശവകുടീരങ്ങൾ ഇവിടെയുണ്ട്. വൈകുന്നേരമായതിനാൽ അതൊന്നും തിരഞ്ഞു കണ്ടു പിടിക്കാൻ സാധിച്ചില്ല. പള്ളിക്കകത്തും കയറാൻ സാധിച്ചില്ല. സുപ്രസിദ്ധ അപസർപ്പക നൊവലിസ്റ്റായ അഗതാ ക്രിസ്ടിയുടെ വിവാഹം ഒരു സ്കോട്ലണ്ടുകാരനുമായി നടന്നതും ഈ പള്ളിയിൽ വച്ച് തന്നെ. ഈ ഒരു പ്രാവശ്യം മാത്രമേ അവർ സ്കോട്ട് ലൻഡിൽ വന്നിട്ടുള്ളൂവത്രേ.

വഴിയിൽക്കൂടി നടക്കുമ്പോൾ ഭയങ്കരമായ ഒരു ശബ്ദം. നോക്കിയപ്പോൾ മൂന്നാം നിലയിലുള്ള എന്തോ മരാമത് പണി കഴിഞ്ഞുള്ള കച്ചറ, മണ്ണും പൊടിയും ഒന്നും പറക്കാതെ താഴെ വച്ചിരിക്കുന്ന ഒരു ഭീമൻ പെട്ടിയിലേക്ക് മുകളിൽ നിന്നും പിടിപ്പിച്ചിരിക്കുന്ന കുഴൽ വഴി താഴേക്കു വരുന്ന സൂത്രം കണ്ടു.
സമയം 6 മണിയായി. നല്ല വിശപ്പുണ്ടായിരുന്നു. നന്നായി കഴിക്കാം എന്ന് കരുതി ശ്രീ സ്ടുവര്റ്റ് ആവശ്യപ്പെട്ട പ്രകാരം ഗാലറിയുടെ അടിയിലുള്ള ഹോട്ടലിൽ കയറി. ചായയോ കാപ്പിയോ സ്മോളോ ലാർജോ എന്ത് വേണമെങ്കിലും കഴിച്ചു കൊള്ളാൻ അദ്ദേഹം പറഞ്ഞു. അപ്പോഴാണ് അത് ഇദ്ദേഹത്തിന്റെ പാക്കേജിൽ പെട്ടതാണ് എന്ന് ഞങ്ങൾ അറിയുന്നത്.

ഉള്ളിൽ ചിത്രപ്പണി ചെയ്ത ഒരു കപ്പു കാപ്പി മാത്രം ഞങ്ങൾ കഴിച്ചു നല്ലവനും വയോവൃദ്ധനുമായ ആ ഗൈഡിനെ ഞങ്ങൾ യാത്രയാക്കി.
വന്ന വഴി ഒരു ടേക്ക് എവേ ഭക്ഷണ ശാലയിൽ നിന്നും ചിലവ വാങ്ങി പഴം ആപ്പിൾ ഒക്കെ ചേർത്തു കാറിൽ ഇരുന്നു തന്നെ കഴിച്ചു ഞങ്ങൾ വീണ്ടും പഴയ ലോഡ്ജിൽ തന്നെ വന്നു കിടന്നു.

facebooktwittergoogle_plusredditpinterestlinkedinmail